Song 6 | NdeIBE | STEP | Sesiye ngaphi isithandwa sakho, wena omuhle kulabo bonke abesifazana? Siqonde ngaphi isithandwa sakho na ukuze sikudingise sona?

Song of Solomon 6

Abangane

1 Sesiye ngaphi isithandwa sakho, wena omuhle kulabo bonke abesifazana? Siqonde ngaphi isithandwa sakho na ukuze sikudingise sona?

Umlobokazi

2 Isithandwa sami sehlele ngesivandeni saso, endimeni yamaluba eziyoliso, ukuzulazula ezivandeni lokuqunta izimbali.

3 Ngingowaso isithandwa sami, laso singowami; siyazulazula phakathi kwezimbali.

Umyeni

4 Umuhle, sithandwa sami, njengeThiriza, uthandeka njengeJerusalema, ulesithunzi njengamabutho ephethe uphawu lwempi.

5 Susa amehlo akho kimi; angihubula igwebu. Izinwele zakho zinjengomhlambi wezimbuzi zisehla eGileyadi.

6 Amazinyo akho anjengomhlambi wezimvu zivela ekugezisweni. Yileyo ihamba laleyo ewelelana layo, kayikho ethe qekele yodwa.

7 Izihlathi zakho ezivalwe liveli lakho zinjengezingxenye zesithelo sephomegranethi.

8 Kungabe kukhona amakhosikazi angamatshumi ayisithupha, labanye abafazi beceleni abangamatshumi aficamibili, lezintombi ezipheleleyo ezingelakubalwa;

9 kodwa ijuba lami, opheleleyo wami, akalinganiswa, nguye yedwa kunina, uyintandokazi yalowo owamzalayo. Izintombi zambona zathi ubusisiwe; amakhosikazi labafazi beceleni bambabaza.

Abangane

10 Ngubani lo oqhamuka njengokusa, omuhle njengenyanga, okhazimula njengelanga, olobukhosi sazinkanyezi ziludwendwe?

Umyeni

11 Ngehlela esivandeni esilezithelo ezilenkelu ngisiyabona amahlumela esigodini, ngisiyabona ingabe amavini ayesenunkula yini langabe amaphomegranethi ayeseqhakazile na.

12 Ngisalibele nje isifiso sami sangibeka ezinqoleni zobukhosi ezabantu bakithi.

Abangane

13 Buya, buya, wena mShulamithi; buya, buya, ukuze thina sibe sikubuka!

Umyeni

Liyabe lisenzelani ukubukela umShulamithi kungathi libuka umgido kamaMahanayimi?